Alveg sprell!

---

Jæja!

Hér er ég,sprell lifandi,glöð og kát. Ég virðist hafa gleymt því í smá tíma að ég væri með blogg. Eða þá bara ekki nennt að sinna því. Segjum samt frekar að ég hafi gleymt mér..það er krúttlegra.

Síðan ég skrifaði síðast hefur afmælishrinan á heimilinu komið og farið. Árni er orðinn enn eldri en hann var og Birkir Ísak lo-hoksins orðinn 5 ára!! Hann tekur aldrinum mjög hátíðlega og er rosa upptekinn af því að það styttist í skólagöngu hjá honum,svo að hann leggur mikinn metnað í það að læra að lesa og skrifa og stendur sig svo vel.

-bestur-

---

Nú bíðum við svo bara spennt eftir alvöru sumri. Þetta hlýtur að fara að detta inn..ehaggi?? Siggi Stormur?? Haaaaa???

Afmælisstrákur.

---

Apríl er mikill afmælismánuður á okkar heimili. Þá eiga Gunnar,Árni og Birkir allir afmæli.

Gunnar Bergvin á afmæli fyrstur,en hann varð 3 ára í gær,þessi litli yndisklumpur okkar!

Hér er afmælisstrákurinn með fínu kórónuna sína og í uppáhalds sokkunum sínum (já hann á uppáhalds sokkapar), bleiku fínu sokkunum.

---

Hér eru nokkrar afmælismyndir af Gunnari Bergvin:

Hann er sko karakter þessi litli kall. :)

---

Næsta afmæli er svo 10 apríl þegar Árni á afmæli. Það er sko endalaust partýstand á þessum bænum.

---

Ljósmyndarinn Róbert.

---

Róbert Elí,7 og hálfs árs(hálfa árið er mjög mikilvægt að sjálfsögðu),hefur alltaf haft mikinn áhuga á því að taka myndir. Hann hefur átt sína myndavél síðan hann var 5 ára og hefur verið duglegur að taka myndir á hana. Núna nýlega fór ég svo að treysta honum fyrir stóru vélinni minni og hann hefur verið að prófa sig áfram með hana. Hann er farinn að taka fínar myndir og hefur greinilega gott auga. Hann hefur fengið sitt eigið albúm inni á myndasíðunni minni,og við vorum að setja inn í það myndir frá því að við fórum í Húsdýragarðinn um daginn.

Endilega kíkið á fínu myndirnar hans. Hann er svo voða stoltur af þeim. :)

Myndirnar eru HÉR.

---

Sunnudagskakan.

---

Það er ekkert leyndarmál að okkur fölskyldunni þykir súkkulaðikaka alveg svakalega góð. Og það er ekkert leyndarmál að ég finni mér endalausar afsakanir fyrir því að baka súkkulaðikökur. Og í dag var afsökunin sú að ég bara varð að prófa uppskrift frá uppáhalds matarbloggaranum mínum,The Pioneer Woman,sem ég hef ekki prófað áður.

Svo að ég bakaði kökuna. Og þessa mun ég sko baka aftur. Og jafnvel aftur. Og aftur..

Ótrúlega einföld,ótrúlega góð!
Fullkomin sunnudagskaka.

Ég gef Ree vinkonu minni orðið:
Ýtið HÉR.
(ég sleppti hnetunum þar sem synirnir eru ekki þeir djörfustu í matarmálum)

---

Vorboðar.

---

Heimilið okkar er eins og gróðurhús þessa dagana. Við erum búin að forsá fræjum og laukum í hvorki meira né minna en 14 ker og potta sem þurfa að vera hérna innan dyra næstu vikurnar,fram yfir síðasta frostið,svo að gróðurhúsafílingurinn verður bara að venjast.

En það verður allt þess virði þegar sumarið kemur og pallurinn verður fullur af fallegum,vel lyktandi og mikið litríkum blómum sem við sáðum alveg sjálf.

Strákarnir fengu allir að velja sér eitt blóm hver,og völdu sér allir dalíur. Svo völdu þeir sér potta,plöntuðu sjálfir og eru duglegir að vökva og fylgjast með..Dalíurnar eru ekki jafn snöggar að láta sjá sig eins og margt annað sem við settum niður,svo að þeir eru orðnir óþreyjufullir þessar elskur.

Smá sýnishorn af því sem er farið að kíkja upp úr moldinni:

Ilmertur,basilíka,gul lilja,flauelisblóm,morgunfrúr og graslaukur.

Þessar eru duglegastar:

Bleikar ilmertur.

Ef vel tekst til verða þær svona í sumar:

Ooooh drífðu þig sumar!!

---

Throwback Thursday.

---

Ég horfði ca. trilljón sinnum á þessa mynd þegar ég var yngri. Jú víst.

Og þá var allt á VHS..hugsið ykkur allan tímann sem fór í það að spóla til baka.

-en alveg þess virði. 

Elska þetta loka atriði ennþá!

---

Pizza pizza.

---

Það er vinsælt á mörgum heimilum að baka pizzu um helgar. Ég geri oftast speltbotninn hennar Ebbu því hann er svo fljótlegur,en þegar ég hef tíma og langar í extra gúrmei pizzu þá geri ég þennan góða botn. Ég fékk uppskriftina hjá Máneyju vinkonu minni í Seattle eftir að hafa mætt í pizzapartý til hennar og smakkað pizzurnar hennar. Hann er rosalega bragðgóður,sem ég get sagt allt of sjaldan um pizzabotna. Og ég mæli sterklega með því að þið setjið bjór út í deigið,hann setur punktinn yfir i-ið. Í alvöru.

---

• 8 dl hveiti
• 1 tsk salt
• 1 tsk sykur
• 2 1/2 tsk ger
• 3 dl volgt vatn (gott að setja bjór á móti vatninu,t.d 50/50)
• 2 msk olía
• Blanda þurrefnum vel saman, passa að vatnið sé ekki of kalt og ekki of heitt.
• Það er svo gott að láta þetta hefast í amk 1 klst. Stundum þarf það lengri tíma.

-Blandið þurrefnunum vel saman og passið að vatnið sé hvorki of heitt né kalt(ca.37gráður)

-Látið hefast í allavega eina klukkustund.

-Það er mjög þægilegt að láta hrærivélina um "erfiðið" ef þið eigið Kithenaid eða aðra vél með krók.

---

Það er allavega pizza og kósí hjá okkur í kvöld. :)

Góða helgi!

Djöflaterta.

---

Himnesk djöflaterta:

..fyrir Jóhönnu..og alla hina sem elska góða súkkulaðiköku. :)

·         4 dl. hveiti

·         2 dl. sykur

·         1.5 dl. púðursykur

·         3 stór egg við stofuhita

·         2.5 dl. vatn

·         0,5 dl. mjólk

·         1,5 tsk lyftiduft

·         1,5 tsk matarsódi

·         ¾ tsk. salt

·         170 gr. smjör við stofuhita

·         1,5 dl. dökkt kakó

·         2 tsk. vanilludropar

 ---

Setjið smjörið í skál og hrærið það á miðlungshraða í ca. 2 mínútur. Hellið því næst sykrinum hægt út í á meðan smjörið er hrært,og leyfið að ganga í ca.4 mínútur.

Bætið kakóinu og vanilludropunum út í og hrærið í ca. 1 mínútu. Bætið einu eggi út í í einu og hrærið í 1 mínútu á milli eggja. 

Hitið mjólk og vatn í potti,rétt svo upp að suðu og takið af hellunni.

Hrærið saman í annari skál: hveiti,lyftidufti,matarsóda og salti. Bætið hægt og rólega út í smjörblönduna,ca hálfan dl í einu og hrærið vel á milli. Hrærið mjólkurblöndunni hægt út í þar til allt er komið vel saman.

Skiptið jafnt í tvö 9 tommu form og bakið í 180 gráðu heitum ofni í 30-35 mínútur.

Kælið vel áður en þið setjið kremið á.

---

KREM:

500 gr.flórsykur

80 gr.kakó

80 gr.brætt smjör

1 egg

1 tsk vanilludropar

3 msk sterkt uppáhellt kaffi (hægt að nota kaffið til að stjórna þykktinni á kreminu.)

Allt sett saman í skál og þeytt vel þar til það er orðið silkimjúkt. 

Voilá. :)

---

Súpa!

Eins og veðrið er búið að vera að undanförnu hefur verið alveg tilvalið að malla góða súpu fyrir fjölskylduna. Þá er þessi hér sérstaklega góð. Það má vel sleppa pastanu,en það gerir þessa súpu svo saðsama og sérstaklega barnvæna. Það er allavega ekki oft sem synir mínir taka svona hraustlega til matar síns þegar það er súpa á boðstólum.

Rjómalöguð tómatsúpa með basilíku og pasta: (uppskrift fyrir 6-8 manns)

-stór uppskrift sem hægt er að minnka,en ótrúlega góð daginn eftir..og daginn eftir. :)

---

-1.l kjúklingasoð

-1/2 l.matr.rjómi

-chili tómatsósa

-laukur

-hvítlaukur

-100 gr.gulrætur

-100 gr.blómkál

-100 gr. brokkolí

-fersk basilíka

-100 gr. pasta eða spaghettí

-2 dósir niðursoðnir tómatar

-Vatn+hveiti

-Salt,pipar,kraftur

---

-Setjið 2-3 gróft skorna lauka í pott ásamt 4 fínsöxuðum hvítlauks rifum og hitið í olíu í okkrar mínútur.

-Hellið einum líter af kjúklingasoði út í og bætið 2 dósum af niðursoðnum tómötum saman við. Ég nota yfirleitt eina dós af „diced tomatoes“ og eina af „pureed tomatoes“ frá Hunt´s. Bætið svo 3-4 stórum stilkum af basilíku út í og leyfið þessu að malla í 5.mínútur(ekki bullsjóða).

-Bætið hálfum líter af matreiðslurjóma og hálfri flösku af Heinz chili tómatsósu saman við og hrærið vel. Hrærið saman 2 msk. af hveiti og 1 dl. af mjólk(enga kekki) og bætið við súpuna til að þykkja hana örlítið.

-Kryddið og bragðbætið eftir smekk. Ég nota salt,svartan pipar, kraft og chili tómatssósuna.

-Bætið svo niðurskornu blómkáli,brokkolíi og gulrótum út í og leyfið öllu að malla í ca. 10-15 min.

-Bætið því næst pastanu saman við og sjóðið súpuna þar til pastað er "al dente".

-Muna svo að veiða basilíku stilkana upp úr áður en þið berið súpuna fram.

-Svo föndrið þið bara við súpuna þar til hún er eins og þið viljið,ég er alltaf að bæta í hana og leyfi henni að sjóða leeengi ef ég hef tíma.

---

Að lokum eru hér þrjár myndir frá óveðursdeginum okkar:

..ég var að fíla þetta veður í botn!

-Sumarið kemur bara þegar það kemur. :)

---

Skonsur.

---

Mamma mín gerir bestu skonsur í heimi. Strákarnir mínir eru sjúkir í þær og alrei,já ég meina það: ALDREI borða þessi börn meira en þegar þeir komast í ömmuskonsur. Þess vegna er ég farin að baka þær hverja helgi,og verð alltaf jafn mikil mamma ársins í þeirra augum.
Það þarf ekki mikið til að gleðja þessa drengi mína.

---

Mömmu/ömmu skonsur:

2 dl. hveiti

1 dl. heilhveiti

3 tsk lyftiduft

3 egg

2,5-3 dl. mjólk

-Hrærið þurrefnum saman í skál.

-Bætið því næst mjólkinni saman við.

-Að lokum er eggjunum bætt við.

Passið að hræra ekki of lengi. Þá verða skonsurnar seigar og það er ekki nógu gott. :)

-Steikið svo á pönnu,og passið að  hafa ekki á of háum hita.

-Snúið skonsunni þegar farnar eru að myndast loftbólur í deiginu.

Okkur finnst skonsur bestar með smjöri,osti og rifsberjasultu. 

Og heimatilbúnu eggjasalati. 

-Og á sparidögum er best að hella á þær góðu hlynsírópi.

Mmmmm...

Hvet ykkur til að prófa..

:)

---

Vel gert Regína..

---

..not.

Vá hvað ég lélegur bloggari. En ég ætla mér svo sannarlega að viðhalda þessu bloggi, mér finnst æði að lesa gömul blogg frá sjálfri mér(vá hvað þetta hljómar sjálfhverft) þegar ég er í einhverri fortíðarþránni og rifja upp gamla tíma. Og oft er ég þá að lesa um hluti sem ég var hreinlega búin að gleyma...

En á meðan mig skortir orðin,þá drita ég bara inn myndum í staðinn. Í þetta sinnið Instagram myndum. Þessar eru frá ca. síðustu 3 vikunum  en Itunesið drap símann um daginn,já bara virkilega drap allt innra með honum greyinu, og ég allt í einu myndalaus með öllu. En þýðir ekki að gráta það..ekki lengur allavega.

---

Kona skellti sér í Kolaportið og lagði mikinn metnað í básinn sinn.

Loksins hitti ég litlu vinkou mína hana Jasmin Leu. Við erum strax svaðalega góðar vinkonur.

Nokkrum dögum seinna fórum við Jasmin Lesa svo út að labba. Við leyfðum mömmu hennar að koma með.

Á Öskudaginn átti ég einn lítinn,en samt svolítið stóran, Bjarnabófa.

..og einn hreinlega alltof krúttlegan Mario.

..og einn svona líka fáránlega sætan Bósa Ljósár. Já hún er rík þessi kona.

Enn og aftur fórum við vinkonurnar út að labba saman. Ég öfunda þessa af kósíinu sem hún á í þessum vagni sínum..

..Bjarnabófinn minn og co. á Öskuaginn. Snillingar,punktur.

Hér er litla,en samt svolítið stóra,barnið mitt eftir fyrstu slysó heimsóknina.  Smá gat á hausinn kallar á sleikjó í verðlaun.

Stóri fór svo að keppa á fótboltamóti um helgina og brilleraði eins og allt liðið hans. Snillingar,punktum!

Valentínusardagurinn er krúttlegur,sama hvað hver segir. Valentínusar dinnerinn hér var asískt kjúklingasalat.

Og að lokum ein af þessum litla,en samt svo stóra,hjartagosa sem telur niður í 5 ára afmælið eins og hann fái borgað fyrir það. 

---

-Þar til næst,

aðíó!

Command Hanging Strips.

---

Ég kynntist þeirri snilld sem "Command Hanging Strips" eru þegar við bjuggum í Seattle. Að rekast á þetta úti í Rite Aid var sem himnasending fyrir okkur þar sem við vorum í leiguhúsnæði og gátum ekki verið að negla í veggina og vesenast. Ég kom heim til Íslands með birgðir af þessu og kaupi alltaf meira í safnið þegar förinni er heitið til Ameríku.

Command Hanging Strips eru sumsé lím strimlar sem gera manni kleift að hengja myndir og fleira á veggina án þess að negla í vegginn. Og ef myndin kemur svo ekki nógu vel út þar sem þið hengduð hana upp,þá einfaldlega takið þið hana niður og hengið annars staðar. Ekkert mál, rífur ekki málninguna af og verður ekkert lím eftir á veggnum.

Ég hef einu sinni fundið þetta hér á Íslandi en þá kostaði það hönd,fót og nýra,svo að ég mæli með því að ef þið eigið leið til Ameríku, að kíkja í næsta Pharmacy og fá ykkur svona.

Kíkið endilega á heimasíðuna þeirra HÉR og sjáið myndbandið á forsíðunni,þar er sýnt hvernig þetta virkar.

Sni-hilld!

---

Sum lög.

---

Sum lög eru bara svo mikið "mmm"...

Misjafn er auðvitað smekkur manna, en í mínum eyrum er þetta lag algert nammi og er eitt mest spilaða lagið inni á iTunes hjá mér.

                                        

Þessa hljómsveit skal ég sjá á tónleikum eihvern daginn.

---

Gamalt verður nýtt.

---

Undanfarið hef ég verið að setja fínu borðsofustólana okkar niður í geymslu,einn í einu. Ég tími því varla að hafa þá uppi við á meðan eldhús og borðstofa eru beisiklí sami hluturinn. Ég tími sumsé ekki að nota þá mikið lengur sem eldhússtóla. Svo að ég hef látið mig dreyma um klassíska,skandinavíska eldhússtóla eins og við áttum þegar ég var lítil. Stólar sem þola mikla notkun og börn sem eru bara því miður ekki þau snyrtilegustu við matarborðið. Og börn sem virðast bara ekki geta lært það að það meigi ekki jugga sér fram og til baka á stólunum.

En nú er allt skandinavískt svo móðins,og þar af leiðandi: ekkert svo ódýrt. Og hvað gerir kona þá? Jú,hún leitar í Góða Hirðinn. Og viti menn. Þrjú stykki draumastólarnir. Þúsund krónur stykkið. Ég er ekki viss,en ég held að ég hafi heyrt kirkjukór syngja "haaaalelúja". Ég er ekki viss,en í minningunni var það þannig.

Eina vandamálið var að stólarir voru svartir og svolítið sjúskaðir. Og ég vildi hvíta stóla. Og ósjúskaða helst.

Næsta stopp var því Byko. Sandpappír,grunnur,málning og penslar.

Og svo heim. Pússa;ekkert svo mikið mál. Grunna;svolítið leiðinlegt,en ekkert svo mikið mál. Mála; svolítið meira mál,þar sem það er aðeins meira nákvæmnisverk,og ég er jú fljótfær og nenni stundum(oft) ekkert að vera að vanda mig of mikið.

En þá hóar kona í vandvirka manninn sinn sem klárar verkið svona líka lystilega. Ég vissi að það hefði verið einhver ástæða fyrir því að ég hefði gifst honum. Djók. En samt..Nei djók.

---

Það má sko jugga sér fram og til baka á þessum stólum!

---

Nýárs.

---

Það var svo yndislegt veður á Nýársdag,svo við fjölskyldan skelltum okkur í útifötin og í góða göngu í Heiðmörk.

Sjötti fjölskyldumeðlimurinn,myndavélin, var að sjálfsögðu með í för.

---

---

Nei..sæl!

---

Gleðilegt nýja árið og velkomin á nýtt blogg,tileinkað tilraunum mínum í eldhúsinu og gríðarlegum áhuga mínum á fallegum heimilum og hlutum.

Ég hef áður slegið um mig í bloggheimum,en dró mig í hlé seinni hluta síðasta árs. Ég finn þó að mig vantar stað þar sem ég get fengið útrás fyrir allt blaður um fallega stóla, drauma sófaborðið og kökuuppskriftir. Þannig sleppur maðurinn minn undan því að þykjast áhugasamur þegar ég byrja slíkt blaður yfir sjónvarpinu á kvöldin. Hann hefur nefnilega jafn mikinn áhuga á þessum efnum,eins og ég hef lítinn áhuga á stáli,sem er jú einmitt í miklu uppáhaldi hjá honum blessuðum..En já,það er annað mál.

Til að keyra þetta í gang ætla að ég að skella inn uppskrift af gamla blogginu mínu. Amerískar brownies hafa verið í miklu (kannsi of miklu?) uppáhaldi hjá mér frá því að við Ástrós frænka eyddum fyrsta sumrinu okkar í Ameríkunni þegar við vorum 11 og 12 ára gamlar. Miðað við magnið af brownies sem ég innbyrgði það sumar,þá skyldi mann undra að ég hefði enn lyst á þeim,en klassíkirnar klikka ekki. Svoleiðis er það nú bara.

---

Amerískar brownies:

-Stillið ofn á 180 gráður

120 ml. olía

2 dl. sykur

2 egg
1 dl. hveiti

80 gr.kakó

1/2 tsk salt

1/2 tsk lyftiduft

1 tsk vanilludropar

-Hrærið olíu og sykri vel saman

-Bætið eggjum og vanillu saman,hrærið aðeins þar til allt er komið saman

-Blandið öllum þurrefnum saman í aðra skál

-Bætið þurrefnunum saman við eggjamixtúruna

-Spreyið lítið eldfast mót og hellið mixtúrunni útí.

-Bakið í ca 20 min,eða þar til hliðarnar eru farnar að losna frá

-Kælið alveg áður en þið skerið.

---



---